Amah Léak

Ngancan makelo ia mandrengin Nengah Yasa ané tusing maklisikan di duur pasaréané, ngancan sukeh asané ia ngengsapang Wayan Suasta ané ipidan nadak ngalahin mati. Tusing karuan apa ané taananga, sagét majeritan tengah lemengé, kejeng-kejeng laut léklok, ilang angkihané. Raini ngeling gelur-gelur dugasé ento ngaé pisagané byayuhan nekain umahné.

Buin maniné, dugas mayitné kapanjusang satondén makutang ka sema, anaké ané ningalin pada pakrimik baana ada laad tregésan kuku ané nyisaang getih mati di basangné. “I Suasta amah léak,” kéto brayané pada makisi-kisi.

Raini maekin jelanan kamarné sawiréh ningeh cicing ngongkong di natahé nyiriang ada anak teka.

“Om Swastyastu, Kak,” Puja, kurenanné, ané uli tuni ngantosang di ambén umahé nyapatin Pekak Suandi ané mara teka.

Legaan bedik kenehné Raini. Ia masé pesu nyapatin I Pekak ané suba uli ibi ngubadin Nengah Yasa.

“Da répot Luh, Kak suba ngopi,” kéto abetné I Pekak ri kala tepukina Raini ngojog ka paon.

Katututin tekén Puja lan Raini, I Pekak lantas macelep ka kamar tongos Nengah Yasa masaré. Lepis pesan muan raréné ané mara matuuh enem bulan ento buka kuangan getih.

“Cén dupané?” I Pekak matakon tekén Puja ané majujuk bengong di sampingné.

Bapan raréné ngénggalang nyemak dupa telung katih laut enyita nganggon colok kayu. I Pekak nrima dupa ané enjuhanga tekén Puja. Buin jahané I Pekak nguncarang mantra sambilanga ngisi dupa aji limané makadadua ané cakupanga di malun tangkahné. Raini lan Puja bareng masaa, mapinunas ring bhatara sami apang Nengah Yasa sida énggal seger lan johanga tekén kahanan ané tuara-tuara.

Suud nguncarang mantra panyengker lan ngubadin, I Pekak laut pesu tugtuga tekén Puja. Raini ngoyong di kamaré nongosin Nengah Yasa.

“Legaang malu,” I Pekak ngraos tekén Puja. “Kak sing ja makelo. Kak lakar kema ka delod désa, nelokin cucuné.”

“Cucu ané cén, Kak?”

“Ketut, ané pinih cenik. Mara san orahanga panes awakné.”

Puja mendep, marasa degdegan baana I Pekak tusing ja nyidang bareng nongosin pianakné ané gelem nuju rainan gedé Kajeng Kliwon buka jani.

“Kanggoang magadang akejep,” kéto raos I Pekak sambilanga nyeluk kantong piyamané lantas mesuang sarana cenik. “Aba né. Yén suba tengah lemeng kema awaké ka sanggah.”

Sambil manggutan Puja nrima sarana cenik ané enjuhanga tekén I Pekak. Pandrengina saranané ento ajahan satondén celepanga ka kantong bajuné.

“Kalahin malu nah,” I Pekak tuunan uli ambéné. “Luh, kalahin malu,” kéto masi ia mapitau tekén Raini.

“Nah Kak, suksma.”

Puja ngatehang Pekak Suandi neked di malun angkul-angkulé. Makelo ia majujuk ngiwasin baliané ento nganti ilang lawatné. Tatkala inget tekén sarana ané baanga tekén Pekak Suandi, ia makesiab awanan engsap matakon lakar anggon apa saranané ento. Ia masi engsap nakonang ngudiang ia orahina ka sanggah tengah lemengé. Ia malengok aslabsaban. Makita ia nugtug I Pekak kéwala kenehné nenga-nenga.

“Ah, mirib sing ja lénan tekén nunas ica,” kéto Puja ngraos tekén déwékné padidi.

Mabalik ka kamarné, Puja laut negak di samping somahné sambilanga nlektekang Nengah Yasa ané nyalempang tan pabayu.

“Tundéné ngudiang tekén I Pekak?” Raini matakon.

“Ka sanggah tengah lemengé.”

Nengah Yasa makiselan. Raini nepok-nepok bokong raréné banban. Puja bangun maekin tongos nyepel keris gelahné. Nadak ada kleteg apang ia ngaba kerisé ento yén ka sanggah tengah lemengé.

“Bli di sisi,” kéto Puja ngraos tekén somahné satondén majalan pesu.

“Nah, Bli,” Raini manggutan.

Negak di ambén umahné, Puja ngenyit roko akatih laut isepa adéng-adéng. Telah akatih sambunga aji ané lénan. Kéto carané ia ngilangang kiap. Wadih ngaroko ia bangun lantas klicak-klicak di natahé. Buin jahané ia ka dauh jinengé meték ubuhan siapné. Suud kéto ia ka paon ngaé yéh anget anggona nyeduh kopi. Sambilanga negak nginem kopi, ia matolihan ka metén. I Mémé pastika suba leplep sirepné, kéto kenehné, apan kohkohané suba tusing madingehan.

Puja ningalin jam di pagelanganné. Jam roras kuang limang menit. Gagésonan ia ka sanggah. Neked di malun korin sanggahé, nadaksara ia marasa jejeh. Korin sanggahé dapetanga maagagan. Mara ia ngeh yén kahanané sepi mangmung, tusing ja ada munyin gumatat-gumitit. “Ento nyiriang ada léak,” kéto taén dingeha anaké ngorta.

Cara kebus dingin rasané, kéwala Puja tusing ja makirig. Ia lakar ngatohin pianakné yadiastun ngemasin mati. Sambilanga kipak-kipek ia macelep ka sanggah. Buin jahané tingalina ada jeleg saru ayag-oyog di malun sanggah kamulané. Nrugtug tangkahné, awakné dingin kesieng-kesieng kéwala ia suba siaga ngarepin.

Adéng-adéng paekina jelegé ané majujuk di malun sanggah kamulané. Pamuputné ia nawang, jelegé ento tusing ja lénan tekén anak luh ané sedeng nguntul. Bokné magambahan ngilidin muané.

“Pasti jalemané né ané ngaénang I Nengah gelem,” Puja ngrenggeng. Getihné sarasa muncrat ka pabahané. Rasa jejeh nadak ilang maganti gedeg. Keris ané abana laut auda uli saungné. Tusing minehin buin ia sahasa nebek anak luhé ento. Kéwala sibarengan ajak munyin anak majeritan anaké luh ento ilang.

Paling paliatné Puja, jejeh yén sagrepa uli duri. Tusing lémpas sangsayané, buin jahané dapetanga siluman ento suba majujuk di duriné marupa celuluk. Gobané patuh sajan tekén ané ngigel di babalihan calonarangé. Bokné igel, endasné lengar asibak, nyonyoné lambih cara buah gedang.

Uli dija kadén teka bayu gedé, buka anak kasurupan sada galak Puja lantas nebek celuluké ento. Ping telu ping pat, nganti dingeha munyi majeritan, daah-duuh naanang sakit. Puja mara marérén nusukang kerisné disubané celuluké ilang kija kadén lakuna.

Awanan celuluké tusing ja ada nengok buin, Puja negtegang bayu. Adéng-adéng kerisé saungina. Peluhné paketéltél uli song buluné makada bajuné belus. Ia laut negak di undagan korin sanggahé sambilanga nyadahang tunduné tur ngusap-usap paningalané, marasa tusing precaya tekén ané tepukina mara sajan. “Béh, mirib ngipi raga ibusan!”

Marasa sangsi, Puja lantas matingtingan.

“Ngudiang makelo di sanggah, Bli?” matakon Raini ri kala Puja macelep ka kamar.

“Ada léak,” kéto abet Puja nyautin.

Raini engsek.

“Da jejeh. Kénkén panaké?”

“Suba nyak manyonyo.”

Lega ningehang munyin somahné, Puja laut mabahan di samping pianakné. Buin jahané ia suba pules leplep baan kaliwat kiap lan kenyel.

Matanainé suba endag dugasé Raini bangun. Ia kradopon ka paon ngaé yéh anget. Biasané semengan matuané suba bangun, negak di ambén meténé, kéwala semengané ento jelanan meténé enu mauneb. 

Disubané nyeduh kopi agelas, ia lantas ngojog ka metén lan nogdog jelanané. Ping pindo ping telu ia suba nogdog jelanan kéwala matuané tusing ja masaut. Raini nyogok jelanané. Sunaran galang bareng macelep disubané jelanané maagagan. Raini makesiab nepukin kahanan matuané, kanti kopi ané abana ulung mabrarakan. Ia majeritan lantang makada somahné bangun kapupungan.

Puja malengok ningalin méméné kekeh nyalempang di duur pasaréané. Ia kituk-kituk, buka tusing precaya tekén ané tepukiné. Di tangkah lan basang méméné dapetanga ada guét-guét cara tatu mawarna pelung. 

“Déwa Ratu! Dong I Mémé ané ngléak ibi sanja?” 7